អន្តរជាតិ៖ មជ្ឈដ្ឋានអន្តរជាតិមានការភ្ញាក់ផ្អើលជាខ្លាំងជុំវិញសេចក្ដីរាយការណ៍អំពីការធ្វើឃាតមេដឹកនាំក្រុមហាម៉ាស លោក Ismail Haniyeh នៅថ្ងៃទី៣១ ខែកក្កដានេះ នៅឯគេហដ្ឋានរបស់លោកស្ថិតក្នុងរដ្ឋធានី តេហេរ៉ង់ (Tehran) ប្រទេសអ៊ីរ៉ង់។ កងកម្លាំងអ៊ីស្រាអែល មកទល់ពេលនេះនៅមិនទាន់មានការអធិប្បាយណាមួយជុំវិញបញ្ហានេះឡើយ។ 

បើទោះបីជាអ្នកទាំងពីរគឺជាគូប្រជែងអំណាចក៏ពិតមែន ប៉ុន្តែប្រធានាធិបតីប៉ាឡេស្ទីន និងជាប្រធានអាជ្ញាធរជាតិប៉ាឡេស្ទីន លោក Mahmud Abbas បានថ្កោលទោសការធ្វើឃាតលើលោក Ismail Haniyeh ថាជាទង្វើដ៏កំសាកបំផុតមួយ។ នៅក្នុងសេចក្ដីថ្លែងការណ៍មួយរបស់ការិយាល័យលោក Mahmud Abbas បញ្ជាក់ថា "ប្រធានាធិបតី Mahmud Abbas នៃរដ្ឋប៉ាឡេស្ទីនបានថ្កោលទោសដាច់អហង្ការចំពោះការធ្វើឃាតមេដឹកនាំក្រុមហាម៉ាស់ លោក Ismail Haniyeh ដោយចាត់ទុកថាវាជាទង្វើដ៏កំសាក និងជាការបង្កើនស្ថានភាពឱ្យកាន់តែតានតឹងឡើង"។ 

សេចក្ដីថ្លែងការណ៍៍ដដែលបានបន្ថែមថា លោក Mahmud Abbas បានជំរុញប្រជាជនឱ្យប្រជាជនប៉ាឡេស្ទីន និងកងកម្លាំងឱ្យរួបរួមគ្នា រក្សាភាពអត់ធ្មត់ និងប្រកាន់យកជំហររឹងមាំប្រឆាំងទៅនឹងការឈ្លានពាន និងកាន់កាប់ទឹកដីពីសំណាក់អ៊ីស្រាអែល។

ដោយឡែក ក្រសួងការបរទេសរបស់កាតាបានហៅការធ្វើឃាតនេះថាជា "ឧក្រិដ្ឋកម្មដ៏សាហាវ" និង "ការធ្វើឃាតដ៏គួរឱ្យអាម៉ាស់"។ ក្រសួងការបរទេសកាតាសង្កត់ធ្ងន់ថា ហេតុការណ៍វាយប្រហារនៅទីក្រុងតេហេរ៉ង់ គឺជា "ការបង្កើននូវគ្រោះថ្នាក់" និងជា "ការរំលោភបំពានលើច្បាប់អន្តរជាតិ និងមនុស្សធម៌"៕